السلام عليكم ورحمة الله وبركاته أخواتى الكريمات
أولا انا كتبت العنوان ده من قهرى للمناظر اللى الواحد بيشوفها فى المجمعات التجاريه والشوارع مش الأولاد بس دا البنات كمان لكن أنا بتكلم على اللى مفروض سيكون عصب البيت ورب الأسره داكلام دا يا أخواتى ينفع كده يا أمة محمد يا خير أمه أخرجت للناس ياأحفاد صلاح الدين .
يرضى ربنا المناظر المفروضه علينا دى ليل ونهار طب دا أنا بطلت أنزل أجيب أغراضى عشان بتحسر لما بشوف الشباب بالباديهات الضيقه والشعور المنفوشه اللى زى المقشه طب دا المفروض هما اللى يدوروا على خلطات مش إحنا .
يا أختى أقترح عليكى إقتراح لو إنتى لسه مخلفتيش وناويه إبنك يبأه على الموضه يبأه من دلوقتى حضرى ليه إسم يليق بهذه المكانه الساميه الا وهى الموضه وإسمحيلى أشاركك فى إختيار الإسم عندك يا ستى(سوسو - توتو -ميمى - نونو )لإن مثل هؤلاء الشباب خساره فيهم شرف الإنتساب لأسماء مثل محمد وأحمد وحسين وعلى .
أعذرونى يا أخواتى لإنى بجد بجد محروقه من داخلى جامد جدا على حال أمتنا اللى كل يوم يتدهور آل وإيه عمالين نشتكى وننادى بالمقاطعه طب مانشوف حالنا الأول!
هل تعتقدى يا عزيزتى الأم ان مثل ابنك هذا سوف يفتح بيت هل يستطيع تحمل المسؤليه ولا إنتى هتروحى معاه فى كل حته لما يكبر .
عشان ما أطولش عليكو انا مش هذكر الأسباب لإن كلنا عارفينهاوألخصها فى كلمه واحده(الديمقراطيه المزعومه)أكيد فهمتو قصدى ولو مفهمتهوش نبأه نعمل جزء ثانى للموضوع.
ندخل فى الحلول علطول:
1- إذا كان إبنك صغير وديه بسرعه عند الحلاق خليه يحلق له حلقه رجاله
2- إذا كان كبير يبأه باللين يا أختى وواحده واحده وشاركى والده فى الموضوع
3-إذا كان إبنك صغيرا فهذه فرصتك إنك تحددى أصدقائه وتختاريهم له عشان يكبروا مع بعض وتكونى عارفه أخلاقهم مع الحرص على حلاقه الشعراولا بأول
4- لاتتركيه يختار ملابسه بنفسه (حسب الموضه)وإنزلى معه إلى الأسواق واختارى مايتناسب مع عاداتنا وتقاليدنا
5-حددى لإبنك ساعه يرجع فيها إلى المنزل إذا كان كبيرا وخلى عينك عليه دايما
6- راقبى موبايله من وقت لآخر شوفى بيكلم مين وإعرفى من هم أصدقائه
وأخيرا يا أختى أقول لك أن التربيه ليست بالسهوله اللى إحنا متصورنها ولازم نتعب من أجل أولادنا ولا هو التعب فى توفير الفلوس لهم وخلاص ومش مهم يصرفوها فى إيه
متزعليش منى يا أختى على الكلام الجامد بس انا قلت لازم نفوق من غيبوبتنا شويه .
عاوزين تفاعل يا أخوات عاوزه أعرف رأيكم