المحشي



المقادير مع الطريقه :

اول شي احفري الكوسا والباذنجان حفر سميك واحتفظي بلب الكوسا على جنب بعدين حضري حشوة المحشي متل ما بتحبيها يعني الموضوع بيعتمد على ذوقك الشخصي بس لا تضيفي الرز ولا الزيت انا مثلا بهرت اللحمه ( خاليه من الدهن ) بالكمون والعصفر والفلفل وبعدين اضيفي لب الكوسا اللي احتفطتي فيه على جنب( طبعا مو كله على حسب الكميه اللي عندك بس الغايه انك تملي معدتك من الخضار اكتر من اللحمه ) افرميه عالماشي بالسكينه بس حتى ينحشى معك بسهوله طبعا ممكن اضافة البقدونس والبصل والتوم للحشوه ومتل ما قلت على حسب ذوقك و كيف بتعمليها للعيله
بعض الأنظمه بكون فيها كميه من الرز مسموح بها مع الوجبه وبهالحاله ممكن تضيفيها للمحشي بس يفضل ارز بسمتي لأنه سعراته الحراريه اقل من الرز المصري بس انا هون ما اضفت رز
احشي الخضار اللي بدك تحشيها وبعدين بالخلاط افرمي كميه من الطماطم ( انا ما بقشرها حتى استفيد من الالياف اللي بالقشور ) فرم ناااااااعم يعني حتى تصير متل الصلصه واغليها على النار مع تمر هندي ( او بدون اذا ما بتحبي فيها حموضه ) وبعد ما تغلي اضيفي الخضار وخليها لحد ما تستوي وبعد ما قربت تستوي انا اضفت توم مدقوق ونعناع وخليتها تغلي عشر دقايق وخلص صارت جاهزه
انا بعطيكم الفكره بس كل وحده تعملها على حسب ما بتحب وعلى حسب ما اتعودت عليها

اما المحشي بالخضار
نفس الفكره بس هون ما بنقدر نستغني عن شوية رز والطريقه باختصار
حمري البصل بحوالي ملعقتين زيت ويتون ( او على حسب الكميه اللي عندك ) طبعا يكون بصل كتير نوعا ما وانا ما بقدر اعطيكم هون مقادير لأنه على حسب الكميه اللي حتعمليها
بعد ما حمرتي البصل اضيفي عليه الطماطم المقطعه قطع صغيره واالرز( قليل جدا من الرز يعني متل التبوله وما ننسى انه حينفش عالطبخ ) وقلبي حوالي 3 دقايق او حتى تحسي انه الرز شرب مية الطماطم
طفي النار واضيفي دبس رمان او عصير ليمون عصير الليمون هنا افضل لأنه اقل سعرات حراريه من دبس الرمان او ممكن تضيفي الاثنين ثم اضيفي البقدونس والنعناع يابس او طازج اضيفي شوية ملح وهون مافي داعي تضيفي لب الكوسا لأنك استعضتي عنه بالبقدونس والطماطم والبصل
كمان افرمي طماطم كما في السابق بس مو كتير يعني حوالي 3 بس ارفعي على النار الطماطم واضيفي تمر هندي وشوية ملح ( التمر هندي سعراته الحراريه ليست مرتفعه وهو يسهل الأمور الله لا يعسر عليكم أمر )
طبعا الحموضه على حسب انتي ما بتحبيها وما ننسى انه بالطريقتين بدك تحشي الخضار عالاخر يعني على قد ما تقدري ادفسيها وخصوصا اذا ما استعملتي رز والا بتطلع طريه كتير وفاضيه

يعطيكي العافية اختي

السلام عليكم ورحمة الله وبركاته

أول وصفة بيعملوها عادة بشرائح صدور الدجاج بس انا من كتر الريجيمات وزهقي من اللحومات استبدلتها بالباذنجان حنزل اول شي طريقة الباذنجان وبعدها بكتب التغييرات اللي تعمليها لما تستعيضي عنها بصدور الدجاج حتي وصفة الباذنجان ممكن تعمليه مع لحمه او بدون
بسم الله نبدأ اول شي بدون لحمه

المقادير
باذنجان
بصل مفروم ناعم
طماطم متل العاده مخلوطه بالخلاط
جبنة موزاريلا او تشيدر قليلة الدسم
طبعا ملح ( متل العاده استغنيت عنه لأنه الجبنه فيها ملح ) بس اذا ما ببتحملي الاكل بلا ملح ما حتحتبيها بدون ملح هالمره فممكن رشه بسيطه
الطريقه
قشري الباذنجان نص تقشيره بشكل خطوط طوليه ثم قطعيه حلقات عريضه بخيه ببخاخ الزيت وحمريه بالفرن يعني شغلي الفرن من فوق بس وقربيه كتير ولما يتحمر اقلبيه على الطرف التي وحمريه من الجهه التانيه انا استغنيت عن بخة الزيت بهالخطوه وحمرته بدون شي ساده
صفيه بصينيه واعملي الصلصه كالمعتاد حمري البصل لحد ما تصير بني فاتح واضيفي الطماطم وسبكيها شوي على النار مع ملح وبهار
اضيفي من الصلصه فوق كل شريحة باذنجان ودخليها الفرن لحد ما تستوي وبعدين طلعيها ورشي الجبنه على الوجه ورجعيها خمس دقايق عالفرن من فوق بس وصحتين وهنا



طبعا ممكن تاكليها مع رز مسلوق او خبز او بدون شي
اما اذا حبيتي تستخدمي اللحمه المفرومه
اشوي الباذنجان بنفس الطريقه وحمري البصله بعدين اضيفي عليها اللحمه وقلبي لحد ما تستوي اللحمه بعدين اضيفي الطماطم وسبكيها وصبيها على البانجان وعالفرن لحد ما تستوي بس بهالحاله مافي داعي للجبنه لأنه اللحمه فيها بروتين كفايه وهي عملتي مسقعه دايت وممكن ايضا اضافة شرائح الفلفل بتطلع لذيذه طبعا موضوع الملح والبهارات بيرجع لذوقك

الطريقة الثالثه
كباب الباذنجان اللي بنعمله بسوريه وهو كالأتي للي ما بتعرف
حمري الباذنجان بالفرن كمان بنفس الطريقة
افرمي على جنب البقدونس مع بصله وااعجنيها مع اللحمه المفرومه وملحك وبهارك
اعملي صلصة الطماطم اللي ذكرتها سابقا طبعا بدون لحمه او ممكن تفرمي الطماطم وتستخدميها كصلصه عالوجه بدون اي طبخ مسبق
هلأ جيبي شريحتين باذنجان واعملي من اللحمه قرص متل قرص البرجر وحطي بالنص بين كل شريحتين وممكن كمان تقطعي الطماطم بالنص وتفرغيها شوي وتحشيها بنفس الطريقه استعملي لبها بالصلصه للوجه
رتبيهم بصينيه واضيفي الصلصه وسويها مع بعضها بالفرن وصحتين
سامحوني انا بالمقادير مو شاطره لأنه على حسب الكميه اللي بدك تعمليها ومنيح كتير اني عم اقدر رتب افكاري واكتب طريقه لأني فوضويه كتير من هالناحيه وعمري ما اتبعت طريقه بحذافيرها ولا حتى اتبعت نفس الطريقه مرتين دائما بغير من عندي على حسب المزاج

اما اذا قررتي تعمليها بصدور الدجاج

بتحتاجي
صدور دجاج مقطعه شرائح وممكن تنقعيها من قبل بيوم ببهار وليمون وبودرة توم على ذوقك

حلقات فلفل اخضر او اي لون بدك
شرائح فطر
شرائح بصل
الصلصة اللي ذكرتها سابقا بدون لحمه وممكن هنا تضيفي الأوريجانو عليها بس خلي فيها مي كتير لا تنشفيها لأنه حتطول بالفرن
جبنة موزاريلا طبعا قليلة الدسم ( ممكن الاستغناء عنها )

الطريقة

بهري شرائح الدجاج وصفيها بصينية الفرن
اضيفي عليها الصلصه وفوق الصلصه شرائح الفلفل والفطر والبصل
دخليها الفرن وبعد ما يستوي الدجاج اضيفي الجبنه المبشورة ورجعيها كام دقيقه وبالهناء والعافيه
هي صار عندك اربع افكار لوصفات جديده يارب تعجبكم

الباي




المقادير :

تفاحه مقشره ومقطعه شرائح صغيره
قرفه
خبز النان الأسمرساده طبعا او اي خبز اسمر بس يفضل خبز نان ( انا استخدمت الخبز الابيض لأنه ما كان عندي نان )
بديل سكر بني والكميه على حسب كيف بتحبي حلاوتها
الطريقه :

ضعي شرائح التفاح بالمكرويف دقيقتين مو اكتر او بالفرن حوالي خمس دقايق الغايه انها تدبل بدون ما تستوي عالأخر
طلعيها من المكرويف ورشي عليها قرفه وبديل السكر واحشيها بخبزة النان وبعدين على النار بخي المقلاه ببخاخ الزيت وحمريها من الطرفين وخلص صارت جاهزه ( اللي عندي بالبيت رشو عليها عسل واكلوها )
انا اخدت من التفاح المخلوط بالقرفه بعد ما برد واكلته مع فنجان القهوه سدقوني لذيذ كتير حتى بدون ما تعمليه باي بس مهم كتير يكون برد او ممكن تحطيه بالبراد

اما الموز اللي بالصحن فهو كالاتي
اقسمي الموزه بالنص بشكل طولي ( على فكره ما اسودت بالعكس لونها كان بيفتح النفس بس انا رشيت عليها قرفه )
امسحيها مسح بعصير الليمون ورشيها ببديل السكر البني وشغلي الفرن من فوق وحمريها شوي وانا بعد ما طلعت رشيت عليها قرفه لأني بحب القرفه كتير اذا ما بتحبي القرفه ممكن تستغني عنها حتى مع التفاح

طريقه حلو ثانيه :

المقادير :
لبن قليل الدسم
بديل السكر
قرفه
فانيليا
شرائح تفاح صغيره ضعيها في الفرن او المكرويف كما في الوصفه السابفه

الطريقه :
سهله جدا وبعتقد واضحه من المكونات
اولا اخفقي اللبن بالسلك مع بديل السكر والفانيليا او ممكن تستعملي ملعقه صغيره سكر سعراتها الحراريه 35 سعر حراري فقط لا غير يعني ما حتأثر كتير
اضيفي القرفه واخلطي بالسلك بعدين شيلي السلك من ايدك وابعديه من وشك حتى ما تغلطي وتستعمليه لأنه بدك تضيفي شرائح التفاح وتحركي بدون ما تكسريها
كتير مهم انه التفاح ما يكون استوى كتير لما شويتيه يعني يادوب يدبل بس حتى ما يتغير لونه لأني مبارح اشتهيت الحلو وحطيته بالمكرويف دقيقتين ونص طلع مستوي كتير وما حبيته
ممكن تستعملي مع هالوصفه اي نوع من انواع الفاكهه بس معظمها ما بدها شوي ضيفيها على اللبن بعد ما تخلطيها بالخلاط مثلا الأناناس والفراوله بس للأمانه الأناناس مره اضفته لجبن الكوتاج صارت طعمها مر كتير وما قدرت اكلها ما بعرف السبب بس عاللبن ما جربت ضيفه

طريقه ثالثه :

وهي اسرع واسهل شي وكتير ظريفه ايام الصيف
ضعي اي نوع من انواع الفاكهه بالخلاط مع قطع تلج وبديل السكر اذا بدك تكون حلوه انا بحط قرفه مع التفاح ما تكتري التلج يعني لو قطعة فاكهه وحده مكعبين تلج بتخيل انه كفايه اخفقيها بالخلاط وقدميها بكاسات شكلها حلو
مع الفراوله بتطلع لذيذه جدا

شوربة الملفوف

المقادير :

المقادير هنا تملأ القدر الى الاخر ( القدر اللي يكفي 5 كاسات ارز مابعرف المقاسات بالليترات )
نصف ملفوفه تقطع مكعبات
نصف حزمة كرفس تقطع شرائح طبعا عرضيه
حوالي 7 بصل اخضر يقطع حلقات مع الورق الأخضر
3 فلفل اخضر واحمر او اي لون متوفر تقطع مكعبات صغيره
طماطم مطحونه بالخلاط على حسب حجمها مثلا لو كان الحجم متوسط اطحني 7 حبات
علبة صغيره صلصة طماطم
ظرف شوربة بصل وانا بستعمل شوربة البصل البني

الطريقه :
تقطع الخضار بالطريقه المذكوره وترص بالقدر بالترتيب المذكور ثم يضاف كاس ماء واحد او ممكن بدون اذا احببتي ان تكون كمية السوائل قليله وترفع على النار حتى تستوي الخضار وتتسبك مع بعضها لا تزيدي عليها مدة الطبخ اول ما تستوي شيليها عن النار وانا بحب ضيف عليها تشيلي يعني فلفل احمر حر بتطلع لذيذه جدا وصحتين وهنا

ناجت الدجاج مع بطاطا مقليه بدون زيت

هي الوصفه بتنفع لكل أفراد العائله وسدقوني ما حدا بيلاحظ الفرق ومنها توفير سعرات حراريه ومنها كمان توفير ريحة زيت وقلي بالبيت ممكن تعمليها على شكل ناجت او فيليه متل الصوره

المقادير :

صدور دجاج مقطعه على شكل شرائح فيليه او ناجي وممكن تنقعيها من قبل بيوم بتوم وليمون اذا بتحبي
بقسماط كما ذكرت سابقا حمصي التوست الأسمر واطحنيه
بهارات على ذوقك
بطاطا مقطعه

الطريقه :

سهله جدا واعتقد واضحة من المقادير غمسي الدجاج بالبقسماط حمي المقلاه ورشيها ببخاخ الزيت او امسحيها مسح بالزيت اذا ما توفر البخاخ حطي عليها الشرائح لما تكون حاميه
حمريها من اول طرف وبعدين اقلبيها للطرف التاني اذا الشرائح سميكه ممكن تحتاجي تغطيها شوي بس يفضل تكون رفيعه حتى تطلع مقرمشه متل المقليه لأنك لما تغطيها السوائل اللي بتطلع منها بيمتصها البقسماط وبتطلع طريه بس ما علينا لذيذه بكلا الحالتين سدقوني
اما البطاطا رشيها ببخاخ الزيت ورشة ملح وحمريها بالفرن

هي الوصفه انا بحبها كتير وحبيت شارككم فيها لأنها خفيفه وبتنفع لكل افراد العائله مو بس للحميه وممكن تعمليها افطار او عشا طبعا هيه المثلث اللي بالزاويه مو الفتوش



المقادير :

4 بيضات أو خمسه ( على حسب حجم البيضه )
لحمة مفرومه على حسب الرغبه ممكن تحبي تكثري او تقللي ويمكن ايضا الاستغناء عنها نهائيا
مقدار الكاس المعياري جنبة الكوتاج قليلة او بدون دسم
فلفل مقطه مكعبات واحده كبيره
3 بصل اخضر مقطع حلقات
ملح وفلفل طبعا ( يفضل الاستغناء عن الملح )
اختياري
ممكن اضافة كوسا مبشوره واحده مع بقدونس على البيض خاصة اذا استغنيتي عن اللحم وهيك بتطلع بتشبه العجه

الطريقه :

اخلطي الجبنه مع البصل والفلفل ومديها بالصينيه على جنب اخفقي البيض جيدا جدا واذا حبيتي تضيفي البقدونس يفضل تخفقيه بالخلاط مع البقدونس
اضيفي الكوسا المبشوره او اللحم اذا حبيتي تعمليها باللحم واخلطي جيدا بالنسبه للحم يجب ان لا يكون متكتل اما الكوسا فلاااااااااا تخلطيها بالخلاط فقط اضيفي وحركي بالملعقه مع البيض
اضيفي الملح والفلفل
صبي الخليط فوق البيض واخبزيها بالفرن لحد ما تدخلي فيها سكينه وتطلع ناشفه ساعتها بكون البيض استوى حمريها من فوق وصحتين وهنا وهي شكلها لما تطلع من الفرن

موس بالكاكاو light

بياض بيضة
كاكاو حسب الرغبة
fructose
قرفة

اخفقي البياض حتى يصبح كالثلج و اضيفي الكاكاو حسب الرغبة+ ملعقة fructose + القرفة

ضعيه في الثلاجة وتذوقيه بارد

البراونيز

المقادير :
الكوب المستخدم هنا هو الكوب المعياري
كوب طحين أسمر بالنخاله
نصف كوب طحين أبيض
نصف كوب بودرة كاكاو غير محلاه ( مره )
3 ملاعق اكل شوكولا سائله ( استخدمت اللي بتجي بعلب مثل علب الكاتشب وهي الخاصه بالايسكريم )
نصف كوب صوص التفاح ( قشري التفاحه وارفعيها على النار مع القليل من الماء حتى تستوي ثم اهرسيها ) وممكن وضعها بالمايكرويف او ممكن تعملي مثلي وتشتريها جاهزه وهي غير مضاف لها سكر
بياض 3 بيضات
ملعقه بيكنج باودر
فانيليا
ملعقتين زيت نباتي ( ممكن الاستغناء عنها )
نصف كوب سكر بني مضغوط ( هيك بيطلع سكرها معقول بس مو ظاهر ممكن تزيدي الكميه اذا بتحبيها حلوه ) او ممكن تضيفي سكر سبليندا اللي سعراته الحراريه صفر

الطريقه :

اخفقي بالخلاط بياض البيض حوالي 3 دقائق وبعدين اضيفي صوص التفاح واخفقي لحد ما يصير متل الكريما بهالشكل



اضيفي الشوكولا السائله والسكر البني والفانيليا واخفقي دقيقتين بعدين اضيفي الطحين بنوعيه وبودرة الكاكاو والبيكنج باودر وارجعي اخفقي الى ان تختفي التكتلات تماما
اخبزيها في فرن محمى مسبقا بدرجة حراره 325 او حسب فرنك كل وحده بتفهم على فرنها



ممكن اضافة قطع جوز او اي نوع مكسرات او زبيب او حتى قطع شوكولا بس المفضل عندي هوه الجوز وكمان حتى مع الحميه المكسرات مسموح بكميه بسيطه منها
ما تخليها مكشوفه للأنها بتنشف اسرع من البراونيز العاديه بس انا عندي قعدت 3 ايام وضل طعمها كأنها طازجه وطريه وهشه

لحم العجل مع الخضار



هي الوصفه سهله كتير وطبعا من الصوره واضحه الطريقه مع المقادير وانا دائما كنت اعملها واكلها صراحه لأنها صحيه فقط لا غير بس هالمره كانت لذيذه جدا لأني غيرت طريقة الطبخ مارح اذكر كميات لأنه يعتمد على الكميه اللي ناويه تعمليها وبتمنى انها تضيف لكم فكره جديده

المقادير :

بروكلي طازج قطعيه على شكل زهرات
بصله مفرومه مكعبات
كرفس طازج
كيس خضار مشكله كما في الصوره
لحم بدون دهن اسلقيه مسبقا اذا امكن وخليه يبرد حتى تقدري تتخلصي من الطبقه الدهنيه اللي بتتجمع على الوجه طبعا يسلق مع ورق غار وبصل ناشف
طماطم مفرومه بالخلاط

الطريقه :

حمري البصل ببخاخ الزيت الى ان يذبل ثم اضيفي اللحم وقلبيه مع البصل بعدين اضيفي الخضار الطازجه قلبيها شوي ثم اضيفي الخضار المثلجه وقلبي كمان حوالي 5 دقايق اضيفي الطماطم والبهارات والملح وخليها على نار هاديه الى ان تذبل الخضار فقط ( لا تخليها تستوي كتير )
انا اكلتها بدون خبز او رز لأنها تحتوي على البازلاء والذره
وصحتين ويارب تعجبكم