يمكن هذي اول مره اكتب موضوع في منتدى بس بعد ماشفت الردود على مشاكل كثير من البنات تشجعت اني اكتب مشكلتي اللي ابى الكل يشاركني في اتخاذ قراري وينصحني شو اسوي

انا مطلقه وعندي 3 اطفال تعرفت على شاب من 3 سنوات تقريبا اكتشفت بعد سنتين انه كان متزوج قبل لا يعرفني وبينهم خلاف هو وحرمته وهي عند اهلها بس بعدها على ذمته وعنده منها ولد وعلى فكره تزاعلنا فتره وقطعته وسار ردها ويلست عنده اسبوع في هلاسبوع حملت بس تزاعلوا مره ثانيه وردها بيت اهلها في فترة اسبوع وكله هذا ماعرفته لاننا كنا متزاعلين وهالكلام من سنتين.
المهم اني انا اكتشفت هالامور كلها ويوم واجهته قال الحمدلله انج عرفتي لاني ماكنت اريد اخسرج وماكنت اعرف اني بحبج هالحب عالعموم من حبي له سامحته بعد ماتأكدت انه بيطلقها ومايبا غيري

والمصيبه اني بعد ماسامحته بشهرين اكتشفت انه يرمس وحده من وراي مع انه حالف عالقرآن مايخوني وهذي ثاني طعنه اسامحه عليها
وقبل يومين صار موقف وابا نصيحيه لاني مااعرف شو اسوي كنا مع بعض فالسياره ودق تلفونه وحده ماتتكلم تمت ساكته المهم قلت له رد اتصل ابا اعرف هذي منو قالي مالج حق ؟؟؟؟ اذا انتي مب واثقه مني برايج تراه تتصل وماترمس شو تبيني اسوي ؟ المهم بعد ضرايب اتصل عليها وتمت تتساخف عالعموم بندت في ويهه ومافيه شئ يثبت انها تعرفه ونزل القرآن بروحه وقال اول مره اشوف الرقم ولو كنت اعرفها كيف برد عليها المهم البنت عقب مابندت طرشت مسج وقالت السموحه مغلطه(وللأمانه هوتغير وايد وتلفونه اربع وعشرين ساعه معاي يرمسني)

تزاعلنا ورديت البيت وعلى رغم اني انا اللي زعلانه هو كان اكثر مني زعلان علي ليش اني ضاربته وقال لي اذا سالفه مثل هذي سوت جيه باجر يوم بنكون في بيت واحد شو بتسوين لو استوا موقف وحد غلطت في رقمي ، انا احبه وايد واتصلت اتأسف له عن اللي سويته بس عقبها اتصلت ومارد على تلفوني الا عقب 7 ساعات (قمت اشك في كل شي حتى اذا مارد علي استخف واقول اكيد مسوي شئ مايباني اعرفه مع ان هالشئ مايستوي الا نادراً) دخيلكن شو اسوي لاني تعبت احبه وخايفه من باجر

وهل له حق يقولي اني مالي خص اعرف منو اللي تتصل وتغلط عليه هل هذي صح وبعد كل اللي سواه في حقي

رجاءاً لا تحرموني من الرد

21 اللي دخلن ولا وحده فكرت ترد علي برد شافي وتنصحني ؟؟؟؟؟

نوعية العلاقة اللي بينكم ماتستوجب انك تسألين عن إتصالاته

إنت لازوجته ولا حتى خطيبته!!

كيييييف تسألين وتحرقين نفسك بنار الغيرة.

طيب هو لو فعلا يبغاك ليه مايخطبك على طول

إيش المانع؟؟؟

رأيي الشخصي إن المفروض ماتقيمين علاقة بالشكل هذا

بعدين المرأة عندها الحاسة السادسة إذا خان الرجل هي على طول تحس بالشي هذا

وهذا اللي صار معاك

تبغين أقولك شي إختصار للكلاااام هذا كله؟؟

(( اللي أوله كذا ينعااااااااااااف تاليه))

الله يوفقك وينور طريقك

السلام عليكم ورحمة الله وبركاته

شوفي أختي هذي المشاكل نقطه في بحر من المشاكل اللي راح تواجهيها إذا ارتبطتي بهذا الشخص
الشك راح يدمر حياتكم لأن أي علاقه تبدأ قبل الزواج والإرتباط الشرعي للأسف عمرها قصير وتنتهي مع بداية الزواج

أختي هذا الرجال لعوووووووب بيتلاعب بك وبمشاعرك

آآآآآسفه على كلامي اللي ممكن يجرحك لكن صدقيني لا تمشي ورا عواطفك

حكمي عقلك.... إنتي تزوجتي مره وهذي الثانيه وأنا أقول لك إن إختيارك لها الشخص وارتباطك به خطأ كبيييييير
ترتكبيه في حق نفسك وأولادك

وهو صادق مو من حقك تسأليه عن الإتصالات اللي تجيه
تسأليه وتحاسبيه بأي صفه!!!!

لو إنك زوجته ممكن لكن هو بيوضح لك حدودك من الآن

نصيحتي لك....

لا تدمري حياتكمع هالإنسان أوقفي علاقتك به فورآ

حرام تستمري معاه وتخوضي تجربه محكوم عليها بالفشل من البدايه

فكري حبيبتي في أولادك ونفسيتهم اللي راح تتدمر بارتباطك بهالشخص
وياليته الشخص المناسب

لا تضحي بسعادتهم علشان ترضيه والله هم أبقى لك صدقيني

بكره ربي يعوضك باللي يعرف قيمتك ويسعدك

وآآآآسفه مره ثانيه لكلامي بهالأسلوب بس والله أنا شايفه مشكلات كثييييير من هالنوع وحبيت أنصحك قبل ماتتورطي

أختــــــــك
القـ*الحنون*ـلب

السلام عليكم ورحمة الله وبركاته

عزيزتي انا بالذات لي رائ خاص فالمواضيع هذي ....و قريت الموضوع و فضلت ما ارد عليه علشان ما احد يزعل مني ....
لكني برد لعيون غاليه على قلبي .....


اولا حبيبتي و قبل شي اللي تسوينه من الاول غلط و حرااااام شرعا ....

انت ام و مسؤله عن تصرفاتك و خروجك مع شاب لوحدكم بالسيارة هذا بحد ذاته عيب مجتمعيا و حراااااام شرعيا ....

الشي الثاني ليش ما يكون كذاب و ان زوجته مو طالعه الا بسبتك ....

ترضين تبنين حياتك على تعاسه و دمار اسرة ثانيه ....

حياتك الزوجيه انتهت و خلفت وراها اطفال و الان تبغين تخربين حيات انسانه ثانيه و ايضا عندها اطفال .....

غاليتي الطلاق مو هين على الاطفال و ياثر عليهم طول العمر فكري باطفالك و اطفال المرة الثانيه قبل ما تفكرين بنفسك .....

وجودك فالعلاقه يعيق رجوع الرجل لرشده و لحرمته ,,,و هي احق منه به شرعا ...

الشي الثني فعلا مو من حقك تسالينه من دق عليك او مين تكلم ووين كنت ؟؟؟؟

زوجته الوحييييييييييده على وجه الارض اللي لها الحق ...

و صدقيني اثبتلك كذبه لو قلتيله تزوجني راح يتملل و يتحجج بزوجته ....

ولو كان صادق بحبه على قولته كان تزوجك من زمااااااان هذي علاقتك معاه 3 سنين مو لعبه ....

3 سنين جيت فيها طفلين ......

عزيزتي اتق الله في نفسك و اعرفي انه شايفك و خااااااااافي من الموت ....

الانسان عزيزتي ضعيف و كل عضو فيه يزني ...

الاذن زناها السمع و العين زناها النظر و اليد زناها ؟؟
و الفرج زناها ؟؟

حبيبتي انا مو ملتزمه علشان اقولك الكلام هذا لكن فكري فالكلام زين و انا مسؤله يوم القيامه عن كلامي معاك ....

اذا حابه تتزوجينه فتاكدي انك راح تعيشين فسوء و لا تقولين انتو نظرتكم سوداويه للامور و لكن ما بني على باطل
فهو باطل ....

و يقول المثل اللي ما له خير فاهله ما له خير فالناس....

اذا كان خان زوجته عشيرة عمرة و حليلته ..... خانها و سوا علاقات انت من ضمنها ....

كيف تثقي فيه و هو اساسا معاك بالغلط ....

هذا ختى لو تزوجتيه راح يسوي نفس الحركه لانه انسان معدوه المسؤليه و ما يخاف الله ....

فماراح يخاف الله فيك ....

انصحك تتركيه و تعيشي حياتك عدل و تربين عيالك لان سمعتك هي سمعتهم لما يكبرون فاحذري تجيبين العار لهم ؟؟

سامحيني لو كنت قاسيه فكلامي لكن هذا الصح ...

اللهم اني بلغت اللهم فاشهد ....

السلام عليكم أختي

قرأت مشكلتك وترددت في الرد لأن لي رأي خاص فيها مثل ماقالت أختي روح و روح
شوفي أختي صحيح أنا مو متزوجه لكن رأيي من رأي الأخت روح والأخت القلب الحنون

صدقيني هاللي تسوينه غلط ومايرضي الله
لا تبنين سعادتك على تعاسة غيرك أولى بهالسعاده منك
ولا تبنين بيتك على أنقاض بيت أنهدم بسبب علاقات مثل العلاقه اللي أنت فيها هالحين
حبيبتي تذكري من ترك شيئاً لله عوضه الله خيراً منه
أتركي هالعلاقه لأجل رب العالمين والله سبحانه بيعوضك خير منها
وثقي إن أي شي لايرضي الله ماراح تلقين فيه السعاده الحقيقيه

يسر الله لك طريق الحق ورزقك السعاده فيه
دمتي بود..

اختي الغاليه

الشك يهدم بيوت العز والكرم

انا لست قاسيه

اكيد انتي كنتي تشكي في زوجك ابو اولادك السابق وهذا كان نتيجته الطلاق وترك اولادك وتفكك الاسره

الشك سلاح فتاك قاتل
ولربما مشاكل مشاكل المحب الجديد مع عائلته لربما تغير اسلوبه وتعمله م ع اسرته

فانا من راي اذا كنت حريصة علي تبني اسرة وحيات جديده فلا تتعلقي بحبال موصوله

فانا قرات موضوعك واحسست انك متسرعه في كل تصرفاتك وليس هذا حب من اجل الزواج بل حب لاكمال رغبتك في التطفل
ارجوا الا اكون قسوت عليك

فاتركي هذا الرجل لاسرته وابحتي عمن يحتاجك فعلا

اختك حيرانه1

الحب يجي ويروح


حتى لو كان صادق بحبه


حبه قصير المدى

ومافيه اقصر من الحب اذا كان بدون حاجز

سواء حاجز الامومه او الاخوه او حتى حاجز الزواج

انت الان رايك بيدك قبل ما يكون بيد غيرك

اختي

لا تجعلي الله اهون الناظرين لك

خلوه غير شرعيه

ر كلام معسول مع ليس بمحرم لك

اتقي الله

اذا سألك الله يوم القيامه

شتجاوبين لربي

تقولين كنت احبه

او تقولين كنت متفقه معه على الزواج

زواج وهمي

احذري

حداري

نفس كلام خواتي اتركيه ووقفي علاقتك معه نصيحه لوجه لله ووقفيها صح بتتعبين بالبدايه عقب بتترتاحين واشغلي وقتك باشياء نافعه اشتركي بجمعيات خيريه او تحفيظ قران او اي شي تشغلين وقتك فيه وانتبهي لعيالك وربيهم هم بحاجتك اللحين ولاتجلسين لحالك واكثري من الدعاء ان الله يعوضك بولد الحلال ومن ترك شي لله عوضه الله خير منه,,وهالعلاقات مامنها فايده صدقيني ماوراها الاالغثاء والقلق والتعب النفسي ومعصيه وذنب وقلق .....ممكن كلامي يجرحك بس هذا الواقع ياختي ....واسال الله العظيم رب العرش الكريم ان يرزقك بولد الحلال الصالح اللي يعوضك ياااارب..

خيتو اتركيه واسمعي كلام البنات وربي انتي الخسرانه وخافي ربك واكثري من الدعاء والاستغفار عسى ربي يفرج همك ويستر عليك ويهديك

ع فكره ترا واضح انو كذاب وراعي بنات فلاتصيري لعبه بين يديه وانتي ماشاء الله كبيره موب صغيره علشان ينقص عليك بسهوله فكري وحكمي عقلك